Keindahan Bahasa Wangsalan Dalam Cakepan Tari Bedhaya Pangkur

Padhang bulan kakêncaran | sêdhênge purnamasidhi || jru dêmung ingêla-êla | kawilêt lang-langan lalu | lêng-lêng kalingan kalalun | kalangên langêning brôngta | ngarang mirong-mirong rangu-rangu | karungrungan mangiriya | riyaning tyas lir tinutus ||

Puspa krêsna ing astana | kalabang sinandhung murub | karênan marang sihipun | satriya andêling yuda | surasaning saning tyas wulangun | wilatung buntal sorotan | anggung katingal wong agung ||

Dêlanggung roro parannya | jangkrik gunung wong angrangkung | kadi tan nyimpang siringsun | kramane pulasing wayang | sata wana wana akêkuncung | mêrak ati warnanira | bandera lit sun lêlayu ||

Minarda ing pakêdhungan | patinggi tilar dhêdhukuh | baya kasusahan wuyung | walulang rineka janma | kukus gantung gantung jêbug arum | wayangane kang sinawang | sumapala polahipun ||

Atmaraga minangkara | tan sawala langêning ywun | srênging karsa kêmbang banyu | wisesa athuking nala | wusing karya karya gayung sumur | dadi têtambaning brôngta | kunir jênar yèn katêmu ||

Narmada têmpur samudra | anyungap rasaning kalbu | gagêlang munggèng panuduh | tan liya liya mung sira | sêsulung kang lung kang mêdal esuk | dalan gêdhe jroning praja | yèn tan liron sih kalurung ||

Macan galak wulu badhak | môngsa borong raganingsun | burat pada bok ya wanuh | loji kulon Majasanga | Bayalali lalia maring sun | kang sela panglawêt gônda | kapisanan ing pandulu ||

Panu biru munggèng jaja | puspita lêsah ing gêlung | sun tohi layon wong ayu | gong alit ing pawayangan | sun têdha têdha bisaa kumpul | karanjang pangubak nila | wus kêburan wartanipun ||

Enggih | babo | teja wiyat kang wisma salin panggonan | babo | srênging karsa tanna ngalih amung sira ||

Enggih | babo | wastra adi pakaryan | wong nungsatara | babo | sun kaliling lêlana saya kalênglêng ||

Enggih | babo | sêmbung gilang dwipôngga lit ing Palembang | babo | singa-singa kang sun gugu mikatoni ||

Enggih | babo | tirta wiyat janma têlik duratmaka | babo | kadya edan kalanglangan lara brôngta ||

Enggih | babo | puspa rêta nayana tan kawatgata | babo | wira-wiri sun ulati nora ana ||

Enggih | babo | buron toya wilisan sanga lan kalih | babo | baya sira nora wêlas maring dasih ||

Enggih | babo | tambang kuda puspitaning jalma lena | babo | ngapus krama | paran wus têlas sihira ||

Enggih | babo | ujung kampuh baju kang tanpa lêngênan | babo | tanpa kônca kontang-kanting lara brôngta ||

Enggih | babo | puspa krêsna sapu bale winatara | babo | kalênglêngan kalut ing lara wiyoga ||

Enggih | babo | toya reka sêmut bang kang cinonthongan | babo | bêndunira arang-arang kawistara ||

Enggih | babo | ilèr ijo ingkang sasana ing Têgal | babo | kênthang-kênthang dasihe tan sinatmata ||

Enggih | babo | kisma rêngat gagêlang munggèng dariji | babo | sun la-êla tan kêna lali sadina ||

Enggih | babo | pêgsi krêsna toya mijil jumantara | babo | gudhandhangan dasihe kedanan dika ||